СУҒА ТҮСУ МАУСЫМЫНДА САҚ БОЛАЙЫҚ!

 

Бүгін Өңірлік коммуникациялар қызметінің алаңында облыстық төтенше жағдайлар департаменті басшыларының қатысуымен өрт бақылау саласы бойынша атқарылған жұмыстар мен суға түсу маусымындағы қауіпсіздік шараларын сақтау бойынша баспасөз-конференциясы өтті.

Жыл басынан бері облыс аумағында 162 өрт оқиғасы орын алған, материалдық шығын көлемі - 33 млн. 460 мың теңге.
«2017 жылдың өрт қаупі маусымында облыс аумағында орман және дала өрттерінің алдын алу және жою жөніндегі іс-шаралар жоспарына сәйкес жергілікті атқарушы органдар мен ерікті өртке қарсы құрылымдардың қатысуымен 8 өрт-тактикалық жаттығу өткізілді. Жаттығуға 65 техника, 330 қызметкер жұмылдырылды. Қазіргі таңда өрттің алдын-алу мақсатында барлығы 1890 адамнан құралған 202 ерікті өрт жасақтары жұмыс жасайды. Олардың иелігінде 436 арнайы техника бар деді», - облыстық төтенше жағдайлар департаментінің басқарма бастығы Р. Қайрақбаев.
Жыл басынан бері облыстағы су айдындарында 4 адам қаза болды, оның 1-і бала. Суда орын алған қайғылы жағдайларға негізгі себеп тұрғындардың қауіпсіздік ережелерін сақтамауы және рұқсат етілмеген жерлерде суға түсуі және кәмелет жасқа толмаған балаларды ата-аналарының қараусыз қалдыруы.
Б. Ембергенов, «Оңтүстік өңірлік аэроұтқыр жедел құтқару жасағы» ММ-нің басшысы:
- Құтқарушылардың судағы қауіпсіздік ескертпелеріне қарамастан бүгін 24 мамыр сағат 12.50-де Қызылорда қаласының Мерей мөлтек ауданы маңында Сырдария өзенінде бір бала суға батып кеткені жөнінде хабарлама түсті. Қазіргі уақытта жасақтың 12 құтқарушысы №136 мектептің 8 сынып оқушысын іздестіру жұмыстарын жүргізуде. Бұл кезеңдегі қауіпсіздік шаралары бойынша қала, аудан әкімдеріне шұғыл тапсырмалар берілді. Халық арасында және облыстағы барлық студенттер мен оқушыларға кездесулер ұйымдастырылып, ескертпелер жасалып, үнпарақтар таратылған.