Қызылорда шаруалары 2014 жылы 10 мың қой алды

Жалпы өткен жылы асыл тұқымды мал шаруашылығын дамытуға үлес қосқан 310 шаруашылық 1524 млн. теңге субсидия алды. 

Тағы бір айта кетерлігі, мал шаруашылығын ғылыми негізде дамыту мақсатында Ы.Жахаев атындағы «Қазақ күріш ғылыми-зерттеу институтының» базасында мал шаруашылығы бөлімі ашылды. 

Бүгінде ет бағытындағы қой тұқымын жетілдіру мақсатында еліміздің алдыңғы қатарлы ғылыми орталықтары Батыс Қазақстан облысы Жәңгір хан атындағы университетінің ғалымдарымен Жалағаш ауданында ет бағытындағы «еділбай» қойына селекциялық асылдандыру жұмыстарын жүргізуде.

Сондай-ақ, Оңтүстік Батыс егін және мал шаруашылығын дамыту ҒЗИ-ның мамандарымен әлемдік нарықта жоғары сұранысқа ие болып отырған қаракөл қойының көк түсімен ет бағытындағы «Атырау етті майлы елтірі» қойын өсіру мақсатында ғылыми жұмыстар жүзеге асырылып, «Ақсеңгір» және «Ақ жол» ШҚ 1540 бас «Атырау етті майлы елтірі» қойы әкелініп өсірілуде. Сонымен бірге, еліміздің белгілі академигі Х.Үкібаевтың басшылығымен Ресейдің Астрахань облысы мен Жамбыл облысынан көк түсті қошқарлар әкелініп, Жаңақорған ауданы «Ынтымақ» ЖШС-де және «Бақытжан» ШҚ-да селекциялық асылданыру жұмыстары жүргізілуде.