«Сыр жұлдыздары» – жаңа мүмкіндіктер алаңы

Әр баланың қабілетін ашып, білім мен ғылымды үйренуіне мол мүмкіндік беретін орталықтың жұмысы жанданған. Баласын жетектеген ата-ана көп. Бірі үйірмеге әкелсе, енді бірі күтіп отыр. Алдымен академия директорының міндетін атқарушы Жанар Бимұратқызы орталықтың жұмысымен таныстырып шықты.

– 2023 жылы Президент Қасым-Жомарт Тоқаев Астана қаласындағы «Сана» балаларға қосымша білім беру орталығымен танысу барысында өңірлерде осындай жобаларды дамыту жөнінде  тапсырма берген болатын. Сол тапсырма аясында облыс әкімінің қолдауымен Сыр өрендерінің шығармашылығы мен зияткерлік әлеуетін дамытуға бағытталған «Сыр жұлдыздары» шығармашылық-инновациялық академиясы бой көтерді. Академия балалар мен жасөспірімдерге қосымша білім беріп, өнерге, ғылымға, технологияға деген қызығушылығын арттырып, шығармашылық қабілетін ашады. Мақсаты – заманауи талаптарға сай жан-жақты дамыған, ұлттық құндылықтарды бойына сіңірген, шығармашылық пен жаңашылдыққа бейім тұлға тәрбиелеу. Бұл бағытта өнер, мәдениет, ғылым және IT салалары бойынша әртүрлі үйірмелер мен курстар ұйымдастырып, дарынды балалардың қабілетін ұштаймыз. Мұнда тек білім беріп қана қоймай, олардың азаматтық жауапкершілігін, патриоттық рухын, елге деген сүйіспеншілігін оятуға көңіл бөлінеді, – деді Жанар Бимұратқызы.

Балалар техникалық  ғылымдар бағытында, қазіргі цифрлық технология дамуының соңғы үлгісі бойынша қосымша білім жетілдіріп, академиялық білімін, шығармашылық, көшбасшылық, зияткерлік  қабілетін де  дамытып, кәсіби  бағдар алады. Оқушылардың  игілігі  үшін ашылған академия 3 қабатты, күніне 3000  баланы  қамтиды, 7 бағыт  бойынша 39 үйірме бар. Атап айтар болсақ, спорт және сауықтыру, ғылыми-техникалық, гуманитарлық-шығармашылық, көркем-эстетикалық, психологиялық дайындық, өлкетану және жастар қозғалысы.

Әр кабинетте балалар кезекті қосымшаға қатысуда. Бейнелеу өнері үйірмесіне қызығушылар көп екен. Онда балалар өз қиялынан  ақ түсті киімдерге түрлі ою-өрнек салуды үйренуде. Принт саласының сарапшысы Ақерке Ахантаева шеберлік сағатын өткізді. Балаларға принт өнерінің қыр-сырын түсіндірді. Оқушылармен бірлесіп, киімдерге этностильде сурет салуды үйретіп,  шығармашылық жұмыстарын көрсетті.

– Екі жылдан бері балабақша, мектеп, қосымша білім беру орталықтарында ақылы және ақысыз шеберлік сағаттарын өткізіп келемін. Балалардың қызығушылығы өте жоғары. Ересек топтағы оқушылар белсенді болды. Қолданатын техникамыз бойынша бояулар арқылы түрлі бейнелер жасайды. Шеберлік сабағы кезінде оқушылар түрлі сұрақ қойып, өз қолымен ерекше туынды жасады, – дейді ол.

Одан әрі шахмат үйірмесіндегі  оқушылардың ойынына куә болдық. Үйірмеде бала саны толық. Жетекші әдіс-тәсілдер үйретіп жатыр екен. Қатысушы Мәдина Нұртас 10 жаста, қаладағы №101 мектептің оқушысы. Бұрыннан шахмат үйірмесіне қатысатын жеткіншек академия ашылып, қабылдау басталған кезде алғашқылардың бірі болып тіркеліпті. Қазір шахматтан бөлек математика үйірмесіне қатысады. Ол болашақта шахматтан чемпион болып, халықаралық жарыстарда ел намысын қорғауды армандайды.

Еркін күрес үйірмесіндегі бозкілемде белдескен балалар әжептәуір шыңдалып қалыпты. Үйірме жетекшісі Бақтияр Батырбек балалардың дайындығы жайында айтып берді.

– Спорт мектебінде еркін күрестен жаттықтырушымын. Бұл салада жеткен жетістігім аз емес. Үш жылдан бері балаларға үйретіп келемін. Жақында осында конкурс жарияланғанын көріп, қатыстым. Мені қабылдады. Қазір үйірмені жүргізудемін. Топта 7-15 жас аралығындағы балалар бар. Аптасына үш рет дайындаламыз. Оларға еркін күрестің техникасын түсіндіріп, шымыр болу үшін жаттығу жасап, білгенімді барынша үйретіп жатырмын. Балалардың спортқа деген қызығушылығы жоғары, сондықтан келешекте олардан нағыз спорт шебері шығатынына сенемін. Себебі, жас спортшылардың шыңдалуына орталықта барлық мүмкіндік қарастырылған, – дейді ол.

Еркін күрес үйірмесінің жас қатысушысы Біржан Дарханбек осындай орталықтың ашылғанына қуанышты. Әлеуметтік желідегі хабарлама арқылы үйірмеге тізілген. Кейін орталық мамандары хабарласып шақырған. Қазір ол жаттығудан қалмайды. Жетекшінің әрбір қимылы мен тәсілін қалт жібермейді. Содан болар еркін күрестің әдісін тез үйреніп алыпты.

Академияда әлі де жұмысын бастамаған үйірмелер бар екен. Бұл туралы Жанар Бимұратқызы былай түсіндірді.

– Жоғарыда аталған 7 бағыт бойынша ашылған үйірмелер жұмысын бастады. Дегенмен кейбірі толық іске қосылмады. Себебі мамандарға конкурс жариялап жатырмыз. Қазір 16 үйірме жұмыс істеп тұр. Оған 2000-дай бала тартылды. Конкурстан өткен мамандар келсе, үйірме қатары толыға береді. Оқу жылы басталған кезде оқушылардың сабақ кестесін ескере отырып, қосымша уақытын реттейтін боламыз. Мәселен, бір үйірме аптасына 2-3 рет, бір жарым сағаттан өтіледі.  Жалпы, орталық – оқушылар үшін жаңа мүмкіндік алаңы. Кәсіби бағдар алып, болашақ мамандығын тереңінен зерттейді. Ғылыми жобалармен айналысады, ІТ саласын меңгереді, жетекшілер өнерге, қолөнерге баулиды. Спортқа қызығушылығы бар балаларды дамытады. Үйірмеге келушілер көп,  балаларға ұнап жатыр, – дейді ол.

Байқағанымыз, балалар белсенді әрі қызығушылығы басым. Тіпті бірнеше үйірмені қатар алып жүрген оқушылар да бар екен. Бастысы, мұнда олардың жан-жақты дамуына қолайлы жағдай жасалған. Осындай жобаның арқасында білім, ғылым, өнер, спорт саласын бағындырар талантты да дарынды жастар өсіп келе жатқанына іштей қуанып қайттық.