Экономика

Қызылорда облысының кәсіпкерлер палатасында аймақ кәсіпкерлерінің қатысуымен ҚР Президентінің «Алтын сапа» сыйлығы мен «Қазақстанның үздік тауары» көрме-конкурсын бағалау өлшеміне қатысты оқыту семинары өтті.

Облыстық кәсіпкерлер палатасы баспасөз қызметінің хабаралуынша, «Алтын сапа» – бұл халыққа қалтқысыз қызмет көрсету саласындағы жақсы нәтижелерге қол жеткізгені және мекемелерге заманауи менеджмент жүйесін енгізгені үшін берілетін сыйлық.

Биылғы жылдан бастап «Алтын сапа» сыйлығы мен «Қазақстанның үздік тауары» көрме-конкурсын «Атамекен» Ұлттық кәсіпкерлер палатасы ұйымдастырып, өткізетін болады.

Семинарды өткізудегі мақсат – сыйлық пен байқауға қатысуға үміткерлерге ереже-талаптарымен таныстырып, кеңес беру, әдістемелік көмек көрсету.

Оқыту семинарын «Алтын сапа» сыйлығы мен «Қазақстанның үздік тауары» көрме-конкурсына қатысушылардың құжаттарын қарап, бағалауда мол тәжірибесі бар үздік сарапшы-аудиторлар: «Атамекен» Ұлттық кәсіпкерлер палатасының Әлеуметтік-еңбек қатынастары департаментінің сарапшысы Бинара Төлегенова мен «НаЦЭкС» АҚ-ның сарапшысы Ольга Ленева өткізді.

Жоғарыда аталған шараларға қатысты «Атамекен» Ұлттық кәсіпкерлер палатасының Әлеуметтік-еңбек қатынастары департаментінің сарапшысы Бинара Төлегенова: «Астана экономкалық Форумының қорытынды есебіне сәйкес біз 50 бәсекеге қабілетті елдердің қатарына ендік. Бәсекеге қабілеттілік – бұл бірінші кезекте халықтың тұрмыс-жағдайын жақсартуға әсер ететін бірден бір фактор болып табылады. Қазір біз аталмыш шараларға қатысты тұжырымдамалар әзірледік. Осы талаптарға сәйкес «Алтын сапа» сыйлығы мен «Қазақстанның үздік тауары» көрме-конкурсы өткізілетін болады», - деді.

Семинарға өңірдегі шағын және орта кәсіпкерлік субъектілерінің өкілдері мен сарапшылар қатысты. Шара қорытындысымен қатысушыларға арнайы сертификаттар табыс етілді.

Айта кету керек, «Алтын сапа» сыйлығы мен «Қазақстанның үздік тауары» көрме-конкурсы қатысуға үміткерлер өтінімдерін 2015 жылғы 1 шілдеге дейін zh.skakova@palata.kz электронды мекен-жайына жолдай алады.