Экономика

«Мұнай өндірісінің азаюы аймақ кәсіпкерлерін дәстүрлі ауыл шаруашылығы саласына қаражат салуға әкелуде. Қызылорда облысының климаты бақша дақылдары, жеміс-жидек пен жылыжайға қолайлы аймақ. Дақыл егуге дария бойындағы суармалы тәсілді пайдаланса, аяқ судан шалғай аумақтарда жер асты суын пайдалануға толық мүмкіндік бар. Биылғы жылы Палата тарапынан пилоттық негізде қолда бар өнімдерді консервілеу шағын цехтарын, өнімдерді бірлесіп өткізу сервистік дайындау ұйымдары мен қабылдау пунктерін жетілдіретін боламыз», - деді есептік кездесуде Палата директоры.

Ғалымбек Жақсылықов өңірде өндірілетін өнімдерді жинап, өңдеу мақсатында Кәсіпкерлер палатасы тарапынан бизнес жоспарлар әзірленіп, пилоттық негізде жүзеге асыру басталып кеткендігін жеткізді.

Ғалымбек Жақсылықов кездесуде Кәсіпкерлер палатасының мамандарымен ауыл шаруашылығы саласындағы кәсіпкерлер кездескен мәселелерді жүйелі шешу тәжірибесі нәтижелі жүзеге асырылып келе жатқандығын айтты. Атап айтқанда, 2019 жылы Палата мамандарының ұсынысымен Ауыл шаруашылығы, Индустрия және инфрақұрылымдық даму министрліктерінің бұйрықтарына өзгерістер енгізіліп, шаруалардың пайдасына шешілген.

Мысалы, Ауыл шаруашлығы министрлігінің өңірлерді дамытудың мамандандыру сызбасына, облыстың аудандары енгізіліп, жеміс-жидек, мақсары, картоп, сүт бағытында ірі қара малдарына жеңілдетілген несиелер мен субсидия алуға қол жеткізілді.

Ірі қара терісін шетелге экспорттау тыйымы алып тасталды. Индустрия министрлігінің теріні экспортқа шығаруды 2019 жылы 6 айға шектеу қоюы, осы кәсіпте жүрген қанша адамның бизнесін тоқтатқан. Ал мал сою пункттерінде, аулаларда сойылған терілер қоқысқа тасталып, қолайсыз жағдайлар тудырған. Жыл соңында мемлекеттік орган шектеуді 5 жылға созуды жоспарлаған екен. Аталмыш мәселе Министрлікке «Атамекеннің» Орталық аппаратына дейін көтеріліп, шектеу жыл соңында алынып тасталды.

Өңірде мал жаюға және шөп шабуға жер учаскелерінің жетіспеушілігі мал басын одан әрі көбейтуге кедергі келтірді дейді Палата басшысы. Атаулы проблеманы шешу барысында Палата мамандарымен «Орман кодексіне» сай облыс кәсіпкерлеріне мемлекеттiк орман қоры учаскелерiн 10 жылдық мерзімге пайдалануға беру тетігі анықталып, облыс басшысының көмегімен орман қоры жерлерін ұзақ мерзімге арендаға алу мәселесі шешілген. Нәтижесінде 110 азаматқа 55 мың гектарға жуық орман қоры жерлері мал жаю және шөп оруға келісім-шарт негізінде табысталған.