Сейхун-инфо.кз

Қызылорда облысында энергиямен жабдықтаушы мекемелердің бекітілген бағасы басқа аймақтарға қарағанда орташа деңгейде болып отыр. Мысалы, Қызылорда облысында орташа босату тарифі 15,02 теңгені құраса, Ақтобе облысында 15,17 теңге, Ақмола облысында-16,31 теңге, Алматы облысында-16,08 теңге, Қостанай облысында -17,57 теңге.

Электр энергиямен жабдықтаушы мекемелердің электрмен жабдықтау құнының құрамында 60 пайызы электр энергияны сатып алу, 37-39 пайызы электр энергияның транзитіне, қалғаны мекемелердің жабдықтауға үстеме ақысы (снабженческая надбавка) болады. Соңғы 5 жыл ішінде мекемелердің тарифтерін бекіту кезінде жабдықтаудың үстеме ақысы өзгеріссіз болған, тек электр энергияның сатып алу құнына байланысты көтерілген.

Қызылорда облысы - энергияға тәуелді аймақтардың бірі болып табылады. Облысымызда жалғыз энергия өндіруші мекеме болғандықтан, жетіспейтін қалған көлемі еліміздің Солтүстік және Оңтүстік аймақтарынан жеткізіледі. Сонымен қатар, электр энергиямен жабдықтаушы мекемелердің тарифіне «КЕГОК» АҚ-ның тасымалдау қызметінің тарифі қосылады.

ҚР табиғи монополияларды реттеу Агенттігінің 2014 жылғы 16 мамырдағы № 105-ОД бұйрығына сәйкес ағымдағы жылдың 1 қарашасынан бастап «КЕГОК» АҚ-ның желілері бойынша электр энергиясын тасымалдау қызметінің тарифі 1 кВт/сағатқа ҚҚС-мен 1,462 теңгеден 2,188 теңгеге дейін көтеріледі. Бұл жағдайда, болжам бойынша облыстағы электр энергиясымен жабдықтау қызметінің тарифтері 4,7 %-дан 5,1%-ға дейін өседі.

Бұдан басқа, ҚР Үкіметінің 2009 жылғы 25 наурыздағы №392 Қаулысына сәйкес 2015 жылдың 1 қаңтарынан бастап электр станциялардан сатып алынатын электрэнергияның бағалары 2,4 %-дан 10 %-ға дейін, сонымен қатар «Қызылорда электр тораптары тарату компаниясы» АҚ-ның тасымалдау қызметіне тарифтің 1 кВт.сағатқа ҚҚС-мен 4,20 теңгеден 5,33 теңгеге дейін өсулері күтілуде, бұл энергиямен жабдықтаушы ұйымдардың орташа босату тарифтерінің 10,9 %-дан 11,1 %-ға дейін өсулеріне әкеледі.

Жоғарыда аталған тарифтердің өзгерулерін ескере отырып, электр энергиясымен жабдықтау қызметіне тарифтердің 16,3 %-дан 16,6 %-ға дейін өсуі мүмкін.