Facebook VK WhatsApp Instagram

Қоғам

0

Еңкейгеннің еңсесін еңбек көтереді

Ірі қара мал өсіру – ауылдық жерде өз бизнесіңізді бастауға жақсы мүмкіндік. Төрт түлікті өсірумен айналысу үшін бұл істің барлық қыр-сырын жақсылап зерттеп алу керек. Ауылшаруашылық саласын дамытуда ет пен сүт тұқымдастарын өсіру, сатуға арналған жас төлдердің басын көбейту сынды бағыттары бар. 
Бүгінде Қазалы ауданында жеке кәсіпті қолға алып, мал шаруашылығын ұршықша иіріп отырғандар қатары еселенуде. 
Олардың санын Әйтеке би кентінің тұрғыны Темірхан Нұрғазыұлы толықтырып отыр. Жақында ол "Ауыл шаруашылығын қаржылай қолдау қоры" акционерлік қоғамынан 4 миллионға жуық несие рәсімдеп, 13 сиыр алған болатын. Қазір олардың үшеуі төлдеп, қорасында баптауда. Сүтін сауып, айран пісіп, құрт жасауда. Артқан сүтті сатып, малға азық қылып отыр.
– Мемлекет берген жеңілдікті қолданып, жеке іспен айналысуға бел будым. Дегенмен биыл малшыларға өте қиынға соғып тұр. Жем-шөп аздық етеді. Оған қоса мал ауруы да өршуде. Сөйте тұра тәуекелге бел буып, осы түліктің ізінде жүрмін. Осылардың он басын Өркендеудегі туысымның жайылымдығына қосып қойдым. Өз қорам аздық етеді. Бәріне күнделікті азығын тауып беру де оңай емес. Сондықтан далалыққа жібердім, – дейді Темірхан Махмутов.
Оның айтуынша, бұған дейін қолда бірер мүйізді ірі қара ұстағандықтан ойлана келе оның басын көбейтуді жөн көрген. Себебі үлкен отбасында 6 бала мен 3 немере тәрбиелеп отыр. Осылайша көпбалалы әке "Бастау бизнес" оқу курсынан білімін толықтырып, кәсіпке қажетті жоспарын дайындайды.
– Отбасыммен келісе отырып өз кәсібімізді аштық. Кәсіпкерлер палатасынан бизнес курсы туралы естіп, жазылдым. Отыз күн оқыдым. Оқып-үйренген білімімнің арқасында өзімнің бизнес-жоспарымды көрсеттім. Жоспарымды мақұлдап, несие алдым. Қазір маған отбасым көмектесуде. Әзірге пайдаға шықпадық. Бірақ болашақта жақсы нәтиже болады деген сенім бар. Алға қойған жоспарларымыз жүзеге асып келеді. Ендігі бір тілегіміз болашақта ауыл сыртынан мал ұстайтын арнаулы жер алуымызға көмек берілсе. Өйткені үй ауласындағы қоралар тарлық етіп отыр. Оның үстіне бұл жағдай ауылдың тазалығы мен экологиялық жағдайына да кері әсерін тигізуде, – дейді кәсіпкер.
«Еңкейгеннің еңсесін еңбек көтереді» деп бекер айтылмаса керек. Таңнан кеш батқанға дейін тер төгіп, мақсатқа жеткен жанның шаруасы шалқып, несібесі артатыны белгілі. Бейнеттің зейнетін көріп, адал еңбегінің өнімін татып отырған Темірхан Махмутовтың жұмысы көпшілікке үлгі етуге тұрарлық десек жаңылмаймыз.

Айнұр ҚАЗМАҒАМБЕТОВА
Пікір қалдыру

Сіз робот еместігіңізді растаңыз - [] *: