Сейхун-инфо.кз

Бұл әсіресе ауқатты және қызметтегі адамдарға тән құбылыс екен. Мұндай бәсекенің алдын алу үшін дін адамдары арнайы үндеу жариялауға да мәжбүр болыпты.

Қызылорда тұрғыны Омарәлі Мұхамадинұлының айтуынша шаш та төк дастархан бүгінде сәнге айналған. Көңіл айтуға барғанда жаназаға емес, тойға келгендей болатынын жасырмайды.

Ол мұндай бәсекелестік мұсылман ағайындар арасына іріткі салып, әлеуметтік теңсіздікке әкеледі дейді.

Мұндай әрекетке әсіресе ауқатты адамдар жиі барады екен

Қараша халықтың айтуынша мұндай әрекетке әсіресе ауқатты адамдар жиі барады екен. Дастарханды былай қойғанда өмірде күнде көріп жүрген жағдайларға қарны ашатынын айтады.

Ысырапшылықты жоюды биліктегілер өзінен бастаса екен деп тілейді.

"Басқаны айтпағанның өзінде мысалы кейбір жерлерде қарапайым адам ішетін суға зар болып отыр, ал кейбір елді мекенде су жазды күні далаға ағып жатыр. Оған қарайтын аудан әкімдері қайда? Ел басшылары қайда? Халық депутаттары қайда? Біз неге сайладық оларды?”, – дейді тұрғын Мұхамадинұлы Омарәлі.

Қызылордадағы дін басыларының айтуынша даңғазалық бір облысқа ғана емес бүкіл елге тән мәселе. Салт-дәстүрден аспай, шариғаттан қашпаудың амалын іздеген олар арнайы үндеу жариялапты.

Жаназа кезінде жыртыс тарату, жүз-жүзге бөлініп шапан үлестіру, мәйітті жууға кіргендерге жаңадан киім сатып алу сияқты әрекеттер жойылса

Құран кәрім мен хадистердерде тыйым салынған амалдарға тосқауыл қоюға шақырғандар жаназа кезінде жыртыс тарату, жүз-жүзге бөлініп шапан үлестіру, мәйітті жууға кіргендерге жаңадан киім сатып алу сияқты әрекеттер жойылса дейді.

"Адам өзінің анасына болсын, әкесіне болсын, бауырларына болсын, тума-туысқанына болсын жасайтын жақсылықты өлмей тұрып, тірі кезінде жасаған абзал болады. Өлгендерімізді, қайтыс болғандарымызды ешқашан ұмытпаймыз. Бірақ бәрі шариғаттың шеңберінде болу керек”, – дейді ҚМДБ-ның Қызылорда облысы бойынша өкілі Талғат Омаров.

Қабір көтеруге келгенде де күмбездеп, зират тұрғызуға асыққандарды дін адамдары құп көрмей отыр. Оған кеткен шығынды баспанаға мұқтаж, пәтерге қолы жетпей жүрген жоқ-жітімдерге беруге шақырады.

Бұл – өмірден озған жақындарына о дүниеде үлкен сауап болып жазылар еді дейді олар.