АҚСУАТТА КӘСІПКЕРЛЕР САНЫ КӨБЕЙДІ

Ауылдың әлеуметтік жағымен қатар, экономикалық әлеуеті де біршама артқан. Түрлі мемлекеттік қолдаулардың арқасында кәсіпкерлік көкжиегін кеңейтіп отырған ақсуаттық азаматтар қатары көп. Мәселен, бүгінде ауылда 4 ЖШС, 45 шаруа қожалығы жемісті жұмыс жасап келеді. Сондай-ақ, шағын және орта бизнесті дамыту аясында 80-нен астам жеке кәсіпкер тіршілік тынысын кеңейтіп, кәсібінің нәсібін көріп отырған жайы бар. «Өрлеу» бағдарламасы бойынша 6 отбасы жұмыспен қамтылып, оларға қаржылай көмек көрсетілді. Игілікті істің нәтижесінде мемлекет қамқорлығын сезінген аталған отбасылар мал шаруашылығымен айналысуға мүмкіндік алып отыр.     Сонымен қатар, ауылдың инфрақұрылым желілері де назардан тыс қалмаған. Республикалық бюджеттен бөлінген қаржыға көшелерді түнгі жарықтандыру, асфальттау мен тас төсеу жұмыстары жасалған. Алдағы уақытта жоспарға сәйкес қалған көше жолдарына кезең-кезеңімен жөндеу шаралары жүргізіледі деп күтілуде.