ҚАЛА КҮНІ ҚАЛАЙ БЕКІДІ?

Еске түсірсеңіз, қала өмірінің маңызды оқиғаларының бірі қала әкімінің шешімімен 7 қазан «Қала күні» болып бекітілді. Қызылордалықтар 2000 жылдың қазан айында қала күнін тұңғыш атап өтті және ең алғашқы мерейтойлық қуанышта орталық алаңда мерекелік шеру ұйымдастырылған. Шеруге қаладағы өндіріс орындары, жоғары және арнаулы оқу орындары, білім ошақтары қатысқан. Дәл сол жылы елге еңбегі сіңген бірқатар азаматтарға «Қызылорда қаласының құрметті азаматы» атағы берілді. Құрметтілердің қатарында сол кезде №198 орта мектептің директоры М.З.Подольский, Қорқыт ата атындағы Қызылорда мемлекеттік университететінің профессоры А.Х.Айдосов бастаған бірқатар белгілі азаматтар болған. Міне, содан бері қызылордалықтар қала күнін жыл сайын атап өтуді дәстүрге айналдырды. Биыл 200 жылдық мерейтойға орай қала билігі барлық іс-шараларды алдын ала халыққа ақпараттандырып, ел назарына ұсынды. 23 қыркүйектен бастау алатын іс-шаралар 10 қазанға дейін жалғасады.