ҚЫЗЫЛОРДАДА АРДАГЕРЛЕР МЕН ОТАН ҚОРҒАУШЫЛАРҒА ҚҰРМЕТ КӨРСЕТІЛДІ

Қызылорда облысының әкімі Қырымбек Көшербаев майданнан оралмаған арыстарымыздың рухына бас иіп, бір минут үнсіздікпен еске алуға шақырып, ардагерлерді мерекелерімен құттықтап, оларға ізгі тілектерін жолдады.

- Кешегі майдангерлерімізге, бүгінгі әскеріміздің айбынын асқақтатар сардарларымыз бен сарбаздарымызға қандай құрмет көрсетсек те жарасады.Қай заманда болмасын ата-бабамыз от пен оққа оранып, жанын қиса да, арын сатпаған, бір сүйем жерін жау қолына ұстатпаған. Ұлы Отан соғысында қаншама қазақстандық сол кездегі ортақ Отан үшін деп опат болды, қаншасы майданнан жараланып келді. Сондықтан да бұл жеңіс – біз үшін аса қымбат! Мемлекет Басшысы, Жоғарғы Бас Қолбасшы Нұрсұлтан Әбішұлы Назарбаев кез келген елдің егемендігі эко¬номикалық және саяси ғана емес, сонымен бірге, әскери әлеуетпен қамтамасыз етілгенде ғана нағыз тәуелсіздікке айналатынын әрдайым айтып келеді,- деді облыс әкімі өзінің құттықтау сөзінде. Шара соңы соғыс жылдарындағы әндерге арналған концерттік бағдарламаға ұласты.