«Сыр жастары» бағдарламасының пайдасы зор

Қызылорда қаласының сол жағалауынан салынған жаңа тұрғын үй көпшілік көңілінен шығады. Жастарды сапалы біліммен, жұмыспен және баспанамен қамту мемлекеттік саясаттың басым бағыты саналады. Жас отбасылар үшін ең өзекті мәселенің бірі – баспана. Осыны ексеріп, 2022 жылдың желтоқсан айында өткен облыстық жастар форумында алғаш рет несиелендіру жолымен «Сыр жастары» бағдарламасын жүзеге асыру туралы шешім қабылданған болатын. «Отбасы банк» акционерлік қоғамына бюджеттік кредит беру үшін облыстық бюджеттен 1,2 млрд теңге бөлінді. «Сыр жастары» – аймақ жастарын баспанамен қамту бағытында қолға алынған өңірлік тың жоба. «Жұмыла көтерген жүк жеңіл» деген сөз бар халқымызда. Бағдарламаны бірлесіп жүзеге асыру үшін «Отбасы банк» АҚ 500 млн теңге қаржы бөлді. Бүгінгі қоныстой – осы бірлескен жұмыстың жемісі.

Жиында тұрғын үйді «Дәнекер» құрылыс компаниясы салды.  Пәтер кілтін алғандар қатарында ұстаздар, медицина, мәдениет және спорт салаларының қызметкерлері, журналистер және өзге де сала мамандары бар.

Қызылордадағы құрылыс қарқыны, әсіресе әлеуметтік нысандардың көптеп салынуы осы саланың жұмысына соны серпін бермек. Мәселен, 300 орындық жатақханасы бар 400 орындық физика-математика мектеп-интернаты жаңа оқу жылында табысталады. Мемлекет басшысының бастамасымен қолға алынған «Жайлы мектеп» ұлттық жобасы аясында биыл 10 мектеп пайдалануға беріледі. Тағы 11 мектептің құрылысы басталады. Облыс орталығында балалар мен жасөспірімдерді шығармашылыққа баулитын «Шығармашылық академиясының», екі ауданда Оқушылар үйі мен Өнер мектептерінің, Қызылорда қаласында үстел теннисі орталығының құрылысы жүруде. Халықаралық стандарттарға сай келетін жабық бассейні бар көпсалалы дене шынықтыру-сауықтыру кешенінің құрылысы басталды. 

Атап өтерлігі, облыс орталығында халықаралық талаптарға сай келетін, 10 мың орындық жаңа стадионның іргетасы қаланды. Ендігі кезекте жаңа стадион UEFA талаптарына сәйкес келеді. 

«ҚазГерМұнай» компаниясының демеушілігімен қолға алынған 350 орындық заманауи үлгідегі Оқушылар сарайы да, «Саутс Ойл» компаниясының демеушілігімен бой көтерген 650 орындық музыкалық колледж ғимараты да жуық арада халық игілігіне айналмақ. Барлық ауданда неке қию залы, кітапхана, музей, архив, жастар сарайы, ардагерлер мен аналар үйін біріктіретін «Руханият» орталықтары салынып жатыр.